英超：車仔衝歐熱刺護級倫敦打吡半和要跟_東方日報

英超煞科戰前「終極快車」，上演兩場直接影響冠軍、歐洲賽資格同降班嘅關鍵賽事。車路士主場對熱刺，車仔下季想踢歐洲賽不容有失，而熱刺亦要搶分護級求「上岸」；至於般尼茅夫對曼城，般茅仲有機會實現入5前踢歐聯嘅「奇迹」，曼城要保奪冠機會同樣不勝無歸，4隊波各有所圖，肯定打甩髀！

車仔衝歐熱刺護級倫敦打吡半和要跟
車路士主場同熱刺合演「倫敦打吡」，兩隊近年對賽有唔少火藥味，今場激戰可期。熱刺目前領先踢多場嘅韋斯咸2分排17位，最後兩輪拎多1分都夠「上岸」；車路士要搶歐戰資格，同樣唔會怠慢。熱刺自迪薩比執教後，防守力明顯提升，今場會先求企穩陣腳，上半場拉鋸居多，博半場和。（Now 623周三凌晨3時15分直播）

今季大部分時間表現欠佳嘅熱刺，臨近季尾終於踢爭氣波，近4場聯賽拎到2勝2和，加上護級對手韋斯咸今輪輸波（見另文），令熱刺今場只贏波就肯定護級成功「上岸」，而且佢哋得失球差遠勝韋斯咸，就算拎1分都99%唔會降班，今場唔需要踢得太過冒險。

「藍戰士」謝幕戰唔衰得
唔好忘記，熱刺鋒線傷兵實在太多，多位主力包括蘇蘭基、古度斯、沙維西蒙斯同古路施夫斯基都養傷缺陣，為免搏殘僅餘嘅前鋒球員，預計球隊上半場多數先鞏固防務，熱刺近5場比賽，就有4場喺上半場打和，當中3場開0比0，留前鬥後踢法會貫徹落去。

車路士啱啱喺英足盃決賽輸畀曼城，意味佢哋要搶入前8名，先可以踢到歐洲賽，而且作為今季主場謝幕戰，相信一眾球星唔敢「揸流攤」，必盡全力終止主場聯賽4連敗頹勢。不過，「藍戰士」近期進攻全面死火，近4場聯賽主場只入過1球，明顯缺乏搶攻本錢，要攻破雄心壯志嘅熱刺防線，有一定難度。翻查兩隊近5次交手，有4次上半場握手言和，追半場和係最佳選擇。

保爭標路曼城出門折茅
英超補賽上演爭標關鍵戰，曼城作客般尼茅夫。「藍月亮」為保持爭奪英超冠軍機會，並無失分空間，今仗必須全取3分，再等待煞科日奇迹出現，佢哋剛贏得英足盃，成為本土雙冠王，氣勢如虹，加上近6場聯賽5勝1和走勢，有力打破般尼茅夫不敗身，客勝屬信心之選。（Now621、611周三凌晨2時30分直播）

先睇聯賽形勢，曼城同榜首阿仙奴積分差距非常少，作為後追嘅曼城唯一任務就係贏波向對手施壓；至於般尼茅夫現時排第6，今場取勝就能夠逼近利物浦，爭取歐聯席位，今場兩隊都有所求，唔會留手。

陣容深厚出副選都夠殺
曼城實力無疑佔優，佢哋近19次對般茅贏咗18場，可謂格食格，但最不利係近期賽程極度緊湊，自月初對愛華頓起到今場，16日內打5場，不過呢段時間哥迪奧拿曾進行輪換，例如上周中對水晶宮就畀主力休息，派出輪換陣容繼續贏波，就算球隊剛喺英足盃搏殺完，今場仍會全力出擊。

般尼茅夫下半季愈戰愈勇，保持17場法定時間不敗，當中近5仗4勝1和，而且球隊正爭取來季歐聯入場券，肯定搏盡；兩隊全力對撼之下，預計曼城就算贏波都係贏1粒，捧客勝之餘，不妨小注曼城「-1」嘅「讓球和」。