意甲：A米攻擊組合多元化拿玻里半大A級之選_東方日報

今輪意甲壓軸之戰，第3位拿玻里主場激鬥次席AC米蘭，兩軍都需搶分追榜首國際米蘭，若打和等同攬炒，惟有豁出去一搏爭勝，兩隊近6次聯賽交鋒，有5次上半場總入球開2球或以上，直取1.5球嘅半場大。（Now 638周二凌晨2時45分直播）文:Mic少

A米攻擊組合多元化
上季冠軍拿玻里近4場聯賽全勝，其中3次上半場領先，踢法搶韁。雖然射手盧卡古近日「玩失蹤」，預料今場無緣上陣，但其實呢位比利時國腳今季大部分時間養傷，即使缺陣亦影響不大。反而最重要係麥湯米尼、海倫等中前場球員保持勇態，翼鋒保列坦奴狀態亦非常出色，近3場意甲上陣攻入1球並交出2次助攻，加上中場大腦奇雲迪布尼上月已傷愈復出，有助增強攻力，可望上半場已經撕破AC米蘭防線。

至於AC米蘭走勢同樣強勁，近4仗取得3勝1負，包括擊敗國際米蘭，展現頑強爭標鬥心。雖然翼鋒拉菲爾利亞奧有傷在身，上陣成疑，但A米勝在進攻多元化，拉比奧特、尼干古皆具備入波能力，甚至中堅史達軒查柏夫洛域今季聯賽都有4球進帳。前鋒辛迪亞高基文尼斯早前已傷愈，教練阿里基手上仍然有大把進攻組合選擇，可以同拿玻里鬥攻，半場大值得捧場。