沙特職：艾利雅德搶分護級細盤益里_東方日報

今晚沙特職繼續有直播好波，艾利雅德主場火併吉達艾阿里。兩隊排名同實力有距離，護級份子艾利雅德近9次主場出擊有8次總入球開3球或以下，包括打和勁旅希拉爾1比1，吉達艾阿里正全力爭冠，不過佢哋作客攻力打折扣，就算贏波都係小勝居多，客Ｗ太熱冇乜肉食，改博中位數3.5球嘅入球細。

（on.cc東網周五凌晨3時直播）文:Mic少

艾利雅德目前排第15位，僅以1分力壓尾3嘅達馬克ＦＣ，隨時跌入降班區，嚟緊場場都要搶分，可惜礙於實力所限，今場想砌低吉達艾阿里機會唔大，預料會屯重兵防守，博打和拎1分好過。事實上艾利雅德近期以「泊大巴」戰術應付強隊，效果唔錯，包括上月逼和希拉爾1比1，今個月初僅以0比1不敵艾納斯。雖然艾利雅德近5場主場未贏過，但其中3場打和有分落袋，相信會繼續以穩守踢法，力阻客軍強攻，務求將失波數字減到最低。

吉達艾阿里作客打折扣
吉達艾阿里擁有艾雲東尼、馬列斯及加連奴等優秀進攻球員，攻力唔使懷疑。不過呢支富豪球隊作客打折扣，一旦遇上對手「鐵桶陣」，往往老鼠拉龜，無從入手，上月聯賽對住2支護級球隊艾科多同艾科魯特，以至上場作客達馬克ＦＣ，無獨有偶都係小勝1比0，唔好期望今仗可以大炒。再睇埋雙方近2次交鋒，吉達艾阿里分別贏1比0及打和1比1，數據話埋畀你知入波唔慌多。