沙特職：冠軍前哨戰步步為營希拉爾艾納斯半細最穩陣_東方日報

沙特職上演「冠軍前哨戰」，榜首希拉爾主場迎戰近期大跌Watt嘅艾納斯。隨住艾納斯近期連環失分，希拉爾反超前「登頂」後，更建立4分優勢，今場大可以睇定嚟食，唔需要冒險搶攻；哀兵上陣嘅艾納斯依家「止血」為先，作客肯定先求穩陣，1.5球嘅半場細值得捧場。（on.cc東網周二凌晨1時30分直播）文:工廠仔

季初戰無不勝嘅艾納斯，開季10連勝後最近回晒塘，近3場聯賽1和2負只拎1分，將榜首位置拱手讓畀希拉爾。法國守將施馬根受傷缺陣，係艾納斯近期頻頻失波一大原因，而前鋒沙迪奧文尼要踢非國盃缺陣，亦令進攻能力削弱，今場面對強敵必先鞏固防務，上半場唔會亂攻。

主隊希拉爾就愈戰愈勇，上場大勝艾哈森後錄得聯賽10連勝，依家拋開艾納斯4分，今場就算和波亦唔係壞事，畢竟艾納斯有C朗拿度、祖奧菲歷斯等巨星壓陣，希拉爾教頭施蒙尼恩沙基當然有所忌憚，預料早段都係穩打穩紮，希望延續近2場半場都贏1比0嘅開局。

近年交手例保守
希拉爾同艾納斯嘅「強強對碰」，大家都唔敢輕舉妄動，戰術上每次都係小心翼翼，必定集中盯死C朗拿度、達雲紐尼斯等殺手，入球機會唔會太多。睇番兩隊過去5次正面對撼，半場總入球全開1球或以下，今場雙方都會繼續保守，開1.5球嘅半場細機會極高。