英足盃：熱刺內亂成落水狗維拉客W踩多腳_東方日報

英足盃第3圈賽事，熱刺主場對阿士東維拉嘅「英超對決」成為焦點。熱刺今季成績沉淪，領隊法蘭克備受壓力，而且喺自家球迷柴台聲不絕下，主場出擊反而成為負累，令熱刺主場成績低迷。熱刺內憂外患，維拉食住個勢必打落水狗，今場直取客勝。

（Now 651周日凌晨1時45分直播）文:Mic少

熱刺上季英超排17位，僅僅護級成功，今季請到法蘭克執教打算大展拳腳，點知表現依然係咁差，周中聯賽輸畀般尼茅夫後，跌到落第14位，球迷嘅不滿情緒瀕臨爆煲，上場賽後就出現雲迪雲、祖奧包連夏等同球迷衝突嘅場面，加上之前將帥不和傳聞，令到更衣室士氣跌落谷底。

Fans柴台踢主場仲衰
熱刺球迷對球隊表現嘅不滿，似乎為球員帶嚟多一份壓力，所以熱刺今季主場出賽，反而踢得更加沉重。熱刺近8場本土賽事主場，只係得1勝3和4負，球隊表現愈差、球迷就更加反感，氣氛更沉重就更大壓力，形成惡性循環。熱刺依家仲有古度斯、蘇蘭基等傷兵，應付密集賽程人腳掹掹緊，睇唔到有咩反彈方法。

作客嘅維拉今季全面起飛，最近14場賽事贏咗12場，就算早前被阿仙奴終止11連勝，球員亦冇被打沉，近2仗有1勝1和，摩根羅渣士、奧尼屈堅斯等主將狀態大勇，勒都勒唔住。維拉近年對熱刺完全佔優，近3次對賽都成功贏波，今有力反客為主。