非國盃：爭標分子遇上好運對手阿爾及利亞和波基會高_東方日報

今晚非國盃E組次輪榜首大戰，由阿爾及利亞硬撼布基納法索。兩軍都揸住3分在手，今仗唔輸都冇蝕底，加上近年碰頭旺和波，隨時又一團和氣，不妨直取和波。（Now 643周一凌晨1時30分直播）文:法達斯維

阿爾及利亞實力絕對係E組最強，今屆劍指冠軍，首輪憑馬列斯梅開二度同伊巴謙馬薩嘅入波，豪贈蘇丹3蛋，陣中仲有法國球王施丹囝囝──盧卡鎮守大門，睇番阿爾及利亞各項賽事近11場，全部法定時間未輸過，單計近6仗就有4場冇失波，防守都幾穩健。

另邊廂，布基納法索首輪對住赤道畿內亞，下半場大部分時間打多個，佔盡上風情況下，卻於85分鐘畀赤軍嘅安尼布爾偷雞得手破僵局，眼看全失3分之際，布軍又神奇地靠明朗古同塔蘇巴喺補時各建一功，絕地反勝2比1，真係行運行到落腳趾尾。

布軍受讓要埋下盤
依家阿爾及利亞與布基納法索都有3分，同組另外兩隊赤道畿內亞同蘇丹皆0分。根據賽制，除咗A至F組每組首2名可晉級，仲有4支小組最佳第3名都可進身16強，假如阿、布今仗打和各得1分，都好大機會至少成為其中1支最佳第3名，打和冇壞，加上雙方近3次碰頭全部和波，再和唔奇。由於讓球盤阿爾及利亞讓到半一，如果想保守啲，可轉玩布基納法索下盤。