英超：曼城半Ｗ顯決森_東方日報

今晚英超早場，諾定咸森林主場鬥曼城，排次席嘅「藍月亮」落後榜首阿仙奴2分，為盡快反超前對方搶番爭標主動權，決心唔使懷疑。事實上曼城近期走勢銳不可當，各項賽事豪取7連勝，全部上半場就領先，有力迅速撕破森林防線，一於支持半場客勝。（Now 621及631周六晚8時30分直播）文:Mic少

森林缺主力雪上加霜
曼城自11月底歐聯不敵利華古遜後，立即反彈踢出一段7連勝走勢，每場最少攻入對手2球，包括歐聯作客西甲豪門皇馬，半場領先2比1下，力守勝果至完場，佢哋喺英超戰線更加「屈機」，聯賽5連勝之餘，近3輪都係上半場先開紀錄，同樣大勝3比0，盡顯霸氣，王牌艾寧夏蘭特腳風極順，近5次上陣合共轟入6粒，淨係佢一個人都足以摧毀森林防線。

森林今季無論成績及演出都令人失望，已經淪為護級分子，仲有主力伊巴謙辛加尼離隊踢非國盃，令球隊雪上加霜。加上佢哋近5次對曼城輸足4次，4場敗仗都係上半場就落後，今場恐怕又迅速失守，「藍月亮」半場客勝值得捧場。